Elusen gofrestredig yw HAHAV (Rhif Comisiwn Elusennau: 1160645) a chwmni cyfyngedig (Rhif Tŷ’r Cwmnïau: 09261439)
Mae HAHAV yn cael ei lywodraethu gan fwrdd o Gyfarwyddwyr ac Ymddiriedolwyr, oll i gyd yn wirfoddolwyr di-dâl. Gyda’i gilydd maent yn gyfrifol am y llwybr strategol, rheoliadau, gonestrwydd ariannol a datblygu’r sefydliad i’r dyfodol.
Ein bwrdd ymddiriedolwyr
Gwerfyl Pierce Jones
Brodor o Gaergybi, Ynys Môn, yw Gwerfyl Pierce Jones ond mae wedi ymgartrefu yn Aberystwyth ers blynyddoedd lawer. Ar ôl graddio yng Ngholeg Prifysgol Gogledd Cymru, Bangor, dechreuodd ei gyrfa fel darlithydd yng Ngholeg Prifysgol Dewi Sant, Llanbedr Pont Steffan. Bu’n gweithio mewn nifer o swyddi ym myd y celfyddydau a bu’n gyfarwyddwr Cyngor Llyfrau Cymru hyd ei hymddeoliad yn 2009. Bu’n Ddirprwy Ganghellor Prifysgol Aberystwyth o 2012–19 gan wasanaethu hefyd fel Dirprwy Gadeirydd Cyngor y Brifysgol. Mae hefyd yn ymwneud â nifer o elusennau ac ymddiriedolaethau ac mae’n gadeirydd Ymddiriedolaeth James Pantyfedwen.
Peter Skitt
Ymunodd Peter â’r GIG yn 1981 ac mae ganddo 40 mlynedd o brofiad o amrywiol swyddi clinigol ac anghlinigol a rolau uwch-reoli. Ar hyn o bryd ef yw Cyfarwydd a Chomisiynydd Sirol Ceredigion (Bwrdd iechyd Prifysgol Hywel Dda) a Chyfarwyddwr Rhaglen ar gyfer ardal Cydbwyllgor Canolbarth Cymru. Roedd gyrfa Peter yn golygu rheoli Gofal Critigol a Theatrau, Rheoli Cyffredinol ym maes Llawfeddygaeth. Mae’n Gymrawd y Sefydliad Rheoli Siartredig ac yn aelod o’r Sefydliad Arweinyddiaeth a Rheolaeth ac yn frwd dros hyfforddi ac arwain, ac yntau’n hyfforddwr gweithredol cymwysedig. Mae Peter yn credu’n gryf mewn gwydnwch cymunedol ac yn un sy’n ymgyrchu i rymuso pobl leol a rhoi llais iddynt.
Deian Creunant
Ar hyn o bryd, mae Deian yn gweithio fel Swyddog Cyfathrebu a Materion Cyhoeddus gyda Chomisiynydd y Gymraeg ac mae wedi gweithio yn y sector cyfathrebu ers bron i ddeng mlynedd ar hugain.
Tan yn ddiweddar, bu’n Gyfarwyddwr Cyfathrebu gyda chwmni sector preifat – Four Communications – lle bu’n arwain ar ymgyrchoedd cleientiaid amrywiol gan gynnwys Iechyd Cyhoeddus Cymru, addysg Llywodraeth Cymru, y Cyngor Sgiliau Sector a Darganfod Ceredigion.
Cyn ymuno â Four, bu’n Bennaeth Cyfathrebu Rhanbarthol i Lywodraeth Cymru yn y Canolbarth a’r Gorllewin a chyn hynny bu’n Bennaeth Materion Allanol y Gronfa Loteri Fawr (y Gronfa Gymunedol bellach) yng Nghymru ac yn Gyfarwyddwr Eisteddfod Genedlaethol Urdd Gobaith Cymru.
Mae hefyd yn aelod o Fwrdd Arad Goch a’r Morlan, yn Ysgrifennydd Cronfa Goffa Saunders Lewis ac yn flaenor yng nghapel y Morfa.
Mae’n mwynhau rhedeg ac yn aelod o Glwb Athletau Aberystwyth, yn ddilynwr brwd o Glwb Pêl-droed Tref Aberystwyth ac yn gyhoeddwr stadiwm ar gyfer eu gemau cartref, yn gyd-drefnydd digwyddiad ffotograffig FfotoAber ac yn hoffi mynychu’r theatr.
Geraint Pugh
Mae Geraint yn dad i ddau o blant. Fe raddiodd o Brifysgol Aberystwyth gyda gradd BA mewn Ffrangeg a Sbaeneg. Arhosodd yn Aberystwyth i astudio ar gyfer MScEcon mewn Gwleidyddiaeth Ewropeaidd, cyn cael gwaith ym myd gwleidyddiaeth.
Rhwng 2006 a 2013, bu Geraint yn Rheolwr Ymchwil a Chyfathrebu i Aelod Senedd Ceredigion, Elin Jones AS.
Ym mis Chwefror 2013, penodwyd Geraint yn Ysgrifennydd Prifysgol cyntaf Prifysgol Aberystwyth. Yn y rôl honno, bu’n gyfrifol am sicrhau bod prosesau llywodraethiant priodol yn eu lle yn y sefydliad, a bu’n gweithio’n agos gyda Chadeirydd y corff llywodraethu a’r Is-Ganghellor.
Ar ôl wyth mlynedd ym Mhrifysgol Aberystwyth, ymunodd Geraint ag S4C fel Ysgrifennydd y Bwrdd ym mis Hydref 2021. Ef sy’n gyfrifol am gynghori Bwrdd Unedol S4C yn eu gwaith o sicrhau llywodraethiant priodol ac effeithiol ar draws holl waith S4C.
Mae Geraint wedi bod yn Drysorydd Cymdeithas Rhieni ac Athrawon Ysgol Gymraeg Aberystwyth ers Medi 2018. Mae hefyd yn Ymddiriedolwr allanol i Undeb Myfyrwyr Prifysgol Bangor.
Rhian Evans
Ymunodd Rhian â Bwrdd HAHAV yn gynnar yn 2023. Mae’n weithiwr proffesiynol profiadol ym maes Adnoddau Dynol sydd wedi ennill gwobrau. Ei rôl bresennol yw Cyfarwyddwr Cynorthwyol Adnoddau Dynol a Chyfathrebu yn Barcud, Cymdeithas Tai gyda thua 300 o weithwyr; lle mae’n arwain tîm o 9 aelod o staff. Ar ôl 20 mlynedd o brofiad ym maes Adnoddau Dynol, mae ganddi brofiad helaeth o reoli amrywiaeth eang o heriau a sefyllfaoedd Adnoddau Dynol. Mae rolau blaenorol Rhian yn cynnwys swydd yng Nghyngor Sir Ceredigion a rôl Ymgynghori ym Mhrifysgol Morgannwg. Mae gan Rhian radd mewn Busnes a Chyllid, MBA mewn Gweinyddiaeth Busnes, a dyfarnwyd Cymrodoriaeth y CIPD iddi yn gydnabyddiaeth o’i phrofiad Rheoli, Arwain a Datblygu.
Ar hyn o bryd mae Rhian yn Llywodraethwr yn Ysgol Bro Pedr, lle bu’n Gadeirydd am dros 8 mlynedd; ac yn ei hamser ‘sbâr’ mae’n arwain Côr Merched!
DR Nia Manning
Bu’r Dr Nia Manning yn ddisgybl yn Ysgol Gyfun Gymunedol Penweddig, Aberystwyth, cyn astudio ar gyfer gradd mewn meddygaeth ym Mhrifysgol Caerdydd.
Ar hyn o bryd, meddyg teulu ym Meddygfa Padarn, Aberystwyth yw hi, ac ymunodd â Bwrdd HAHAV ym mis Tachwedd 2023.
DR Sion James
Meddyg teulu ym Meddygfa Tregaron yw’r Dr Siôn James ac mae’n aelod o Goleg Brenhinol y Meddygon Teulu. Ymhlith ei ddiddordebau arbenigol mae iechyd meddwl, iechyd plant a gofal lliniarol.
Mae’r Dr James hefyd yn Ddirprwy Gyfarwyddwr Gofal Sylfaenol a Gwasanaethau Cymunedol ar gyfer Bwrdd Iechyd Prifysgol Hywel Dda.
Ymunodd â Bwrdd HAHAV ym mis Tachwedd 2023.
June Wells
Hyfforddodd June fel athrawes ysgol uwchradd (Bwyd, Tescstilau ac Ymarfer Corff) ym 1980. Treuliodd 4 blynedd yn dysgu yn Ysgol Cockshut Hill yn Birmingham cyn symud i Goleg Chweched Dosbarth Cadbury am 3 blynedd. Ar ôl egwyl fer i fagu 3 o blant treuliodd bron i 25 mlynedd yn Ysgol Penglais, lle aeth yn fuan iawn yn Bennaeth Technoleg Dylunio.
Tyfodd hon i fod yn adran fawr, lwyddiannus lle roedd yn rheoli 10 aelod o staff.
Ers iddi ymddeol yn 2019 mae June wedi gallu mwynhau llawer o’i diddordebau hamdden; marchogaeth, cerdded, teithio a garddio. Yn 2020 dechreuodd wirfoddoli gyda HAHAV drwy helpu yn y siop.
Ers hynny, mae hi wedi bod yn aelod o’r is-grŵp manwerthu, ac mae hi’n parhau i wirfoddoli yn y siop a’r warws. Yn 2023 dechreuodd hyfforddiant ar fod yn Gyfaill mewn Galar, gan ymgymryd â’r rôl newydd hon yn HAHAV yn 2024.
Mae June yn hael gyda’i hamser am ei bod yn teimlo bod HAHAV yn elusen wych sy’n helpu cymaint o bobl sy’n byw gyda chyflyrau sy’n cyfyngu ar eu bywyd, yn ogystal á’u gofalwyr/teulu, i wella ansawdd eu bywyd.
Alun Pearson Thomas
Ymddeolodd Alun Pearson Thomas fel cyfreithiwr uchel ei barch gyda’r ffyrm Alun Thomas John ym mis Mai 2024 wedi 53 blynedd o ymarfer ym maes y gyfraith. Bu’n gwasanaethu am flyndyddoed lawer fel Dirprwy Farnwr Rhanbarth yn y llys sirol ac fel Cadeirydd Tribiwnlys rhan-amser. Mae’n byw gyda’i wraig Kay yn Aberystywth ac mae gyda nhw ddau o blant a phedwar o wyrion.
Mark Godsell
Brodor o’r Trallwng yw Mark. Maen byw yn ardal Aberystwyth ers 15 mlynedd. Mae ganddo 25 mlynedd o brofiad ers cymhwyso, gan wasanaethu mewn nifer o rolau ar lefel uwch mewn sefydliadau mawr yng Nghymru a Lloegr. Tan yn ddiweddar, ef oedd Dirprwy Gyfarwyddwr Cyllid Prifysgol Aberysywth. Bu’n gweithio’n bennaf mewn gwasanaethau cyhoeddus ac mae wedi arwain adrannau cyllid ac wedi rheoli’r ystod lawn o swyddogaethau cyllid mewn sefydliadau mawr. Mae gan Mark brofiad helaeth o lunio a chyflwyno adroddiadau i fyrddau ac ymwneud ag aelodau o fyrddau. Mae ganddo radd anrhydedd mewn Cyllid a Chyfrifeg, MBA o Brifysgol Birmingham ac mae’n Gymrawd o Gymdeithas y Cyfrifwyr Ardystiedig Siartredig.